Qırımda Rusiyeniñ Ekstremizm ile küreş merkezi "Eski Qırım" mustaqil musulman cemiyetinde tintüvlerden aman-aman bir ay keçken soñ yasaq etilgen edebiyatnıñ saqlanuvı aqqında memuriy protokol tizdi.
Bu aqta "Qırım birdemligi" cemaat birleşmesi bildire, onıñ mütenasip protokolnıñ kopiyası bar.
Faallerniñ yazğanına köre, onda "E" Merkeziniñ operativcisi P.A. Kaziyevniñ qayd etkenine köre, Eski Qırımdaki "Zubeyr Cami" camisi "Eski Qırım" din cemiyetinen bağlı. Fevralniñ 29-nda keçirilgen tintüv vaqtında anda yasaq etilgen edebiyat cedvelinden kitaplar tapıldı ve alındı. Söz Sayid Nursi "Risale-i Nur" "Munacat (Dua). Üçünci nur", eserler cıyıntığından kitap ve Taqiyeddin an-Nabhani "İslâm sisteması" kitabı aqqındadır. Ekisi de farqlı vaqıtlarda Rusiye mahkemeleriniñ qararları ile Federal ekstremistik malümat cedveline kirsetilgen edi.
Rusiye uquq qoruyıcıları qayd eteler ki, "Eski Qırım" cemiyeti "ekstremist materiallarnıñ kütleviy darqatıluvı içün saqlanmasına yol berdi" ve böyle materiallarnıñ azırlanması ve darqatıluvı aqqında maddeni bozdı.
"Qırım birdemligi" yazğanına köre, protokol cemiyet reisi İdris Yurdamov adına tizilgen. Vesiqada o, protokolnen razı olmağanını ve cemiyetniñ "Zubeyr Cami" camisine iç bir alâqası olmağanını añlattı.
"Kitaplar bizge ait degil. Camide nasıl peyda olğanlarını añlamaymız», – dep yazdı Yurdamov.
Fevralniñ 29-nda saba Eski Qırım ve Juravki köyünde Rusiye quvetçileri dört qırımtatarınıñ - Lenur Yakubov, İzet Sayfulin, İdris Yurdamov ve Şevket Kiyamovnıñ evlerinde tintüv keçirdi. Bundan ğayrı, Eski Qırım şeeriniñ camisinde tintüvler keçirildi.
Tintüvler neticesinde Eski Qırımdan faaliyetçi ve iş adamı Lenur Yakubov ve "Eski Qırım" mustaqil musulman cemiyetiniñ imamı İzet Sayfulinniñ tutuluvı aqqında haber etildi. İdris Yurdamov ve Şevket Kiyamovnı Rusiye quvetçileri evlerinde qaldırdı. Memuriy protokollar daa tizilmegen edi.
Daa soñra belli oldı ki, Sayfulinni polis bölüginden yiberdiler. Oña qarşı "qanunsız missionerlik faaliyeti" içün memuriy protokol tizildi. Bundan ğayrı, Lenur Yakubovğa qarşı memuriy protokol tizildi, Rusiye mahkemesi onı 14 künge apiske aldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
