Qırımda 2024 senesi avgustnıñ 5-nde Rusiye quvetçileri "İyegova şaatları" diniy teşkilâtınıñ altı vekilini tintti ve sorğuğa çekti. "İyegova şaatları" Avropa assotsiatsiyasınıñ bildirgenine köre, bir qart apayğa qarşı cinaiy dava açıldı.
"Saba erte maska kiygen bir qaç silâlı quvetçi Aq Şeyh, Senokovnoye ve Aluşta şeerinde adamlarnıñ evine kirdi. Qanun qoruyıcılar elektron cihazlarınıñ parollerini talap etti, dindaşları aqqında soradı, ev ayvanlarına zarar ketireceklerini de ayttılar. Elektron cihazlar, şu cümleden bir dögmeli telefon ve şahsiy qaydlar tutıp alındı. Tintüvler Qırım Cumhuriyeti boyunca taqiqat komitetiniñ baş tahqiqatçısı Ya. A. Merkulova", — dep aytıla beyanatta.
Anda şunı da qoştılar ki, Aq Şeyh qasabasında din kütkenlerden birine işke kelgenler. Onı yüzünen yerge yatqızğanlar ve qollarını kapronnen sıqıştırğanlar, bu sebepten o yaralanğan. Daa soñra adam travma noqtasında yaralanğanını qayd etti, lâkin onıñ tibbiy vesiqasını politsiya bölüginde tutıp alğanlar .
Tintüvler başlağanından 4 saat keçken soñ, 68 yaşındaki Tamara Bratsevağa qarşı Rusiye Federatsiyasınıñ Ceza kodeksiniñ 282.2 maddesi ile cinaiy iş açıldı.
"İyegova şaatları" Avropa assotsiatsiyasınıñ malümatına köre, soñki 7 yıl içinde Qırımda 30 din adamı diniy sebeplerden taqip etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
