Sudaq civarındaki Toqluq (Bogatovka) köyünde Rusiye quvetçileri noyabrniñ 14-nde qırımtatarı, yunan-roma küreş idmancısı ve VI çağırılış Qırımtatar Milliy Qurultayınıñ delegatı İsmet Saliyevniñ evini tintti. Bu aqta qırımtatar faali Zair Smedlâ Qırım.Aqiqatqa bildirdi.
«Operativ-qıdıruv tedbirleri sebebinden keldi sanki: terrorizm, daa bir şeyniñ ögüni aluv. Tintüv keçirgenler, silâ, narkotik qıdırğan ekenler. Saliyev evde yoq edi. Onı, bilgenime köre, tutmadılar. Başqa tafsilâtlarım yoq», – dedi Smedlâ.
Onıñ fikirince, tintüvlerniñ terror telükesinen alâqası yoq.
«Tahminlerime köre, bunıñ mifik terror telükelerinen alâqası yoq, onıñ küreşçilerni azırlağanınen bağlıdır. Onıñ talebesi Ukraina taqımında iştirak etip, Avropa çempionatında ğalebeler qaza», – dep qoştı faal.
Bu malümatnı Facebook saifesinde Qırımtatar Milliy meclisiniñ azası Gayana Yüksel de derc etti. O, tintüv noyabrniñ 14-nde saba saat 6-da başladı, dep qayd etti.
Qırımnıñ Rusiye quvet organları bu tintüv aqqında haber etmey. Quvet müessismeleriniñ izaatları da yoq.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
