Qırımnıñ Qurman rayonınıñ Büyük Onlar qasabasında Rusiye quvetçileri qırımtatarlarğa "kütleviy qanunsız tedbirlerde" iştirak etüv yasağına dair tenbi vesiqalarını berip çıqqanlar ve dronlar aqqında soraştırğanlar.
Rusiye quvetçileri tarafından ziyaret etilgenler arasında siyasiy mabüsler Rustem Emiruseinov ve Arsen Abhairovnıñ esli-başlı ana-babaları, "Qırım birdemliginiñ" mühbiri Kulamet İbraimov, 64 yaşında Şadiye Qatıq, 61 yaşında Zera Satilvaldiyeva ve Yunus Veliyev bar. Episi bir qaç kün evelsi "Qurman gruppasından" üç qırımtatarınıñ tutuluvına bağışlanğan duağa barğan.
Qayd etmeli ki, tenbi vesiqasını siyasiy mabüs Emil Ziyadinovnıñ yaşağan yerine de ketirgenler. Ziyadinov Rusiye mahkemesi tarafından 17 yılğa mahküm etilgen.
«Polis hadimi Emil Ziyadinovnen laf etmege istey, dep ayttı. Anası laf etip olamazlar dedi. O, sebebini soradı. O, apiste olğanını ayttı, soñra aylanıp ketti», – dep ayttı siyasiy mabüsniñ ömür arqadaşı Elviye Ziyadinova.
Rusiye quvetçileri siyasiy mabüs Rustem Emiruseinovnıñ ana-babası Reşat ve Zure Emiruseinovlarğa da aynı tenbi vesiqalarını ketirgenler. Qadın sağlığı içüm çıqıp olamağan.
«Uçaq, dronlar uçqanını kördiñizmi dey, men uçaqlarnı kördim, qalğanını bilmeyim dedim. Soñra mahsus operatsiyağa (Rusiye akimiyeti Ukrayinağa qarşı cenkni böyle adlandıra – QA) qarşı teşviq etmege kelelermi dep sorağanlar», – dep tarif etti Emiruseinov.
Polis hadimleri esli-başlı Zure Emirüseinovanıñ çıqmasınıı da talap etkenler.
"Apayım çıqsın dep talap ettiler, amma o ağır hasta, yürip olamay. Azbarğa kirecek oldılar. Pencerege yaqın kelsinler dediler. Amma men olarnı azbarıma yibermedim, çünki onıñ alıp pek fena, oña nervalanmağa mümkün degil", - dep qoştı Reşat Emirüseinov.
"Qırım birdemligi" cemaat birleşmesiniñ mühbiri Kulamet İbraimovğa Rusiye quvetçileri tenbi vesiqasını mekân qaydı olğan yerge ketirgenler. Jurnalist özü ise başqa yerde otura. Ağası çıqqan. "Kütleviy qanunsız tedbirlerde" iştirak etüv yasağına dair tenbi vesiqasını bergenler. Bundan ğayrı hadimler Büyük Onlar üzerinde pilotsız uçaqlar uçtımı yoqmı kibi sualler bergenler.
«Bu tenbini Qırımdaki mustaqil jurnalist faaliyetine qarşı daa bir basqı ıntıluvı dep sayam, çünki 2014 senesinden berli mında olğanlarnı aydınlatamız. Menden ğayrı, daa altı qorantağa kelgenler. Bu meni toqtatmaz, jurnalist faaliyetime tesir etmeycek», – dep izaatladı adiseni Kulamet İbraimov.
Bu kibi tenbi vesiqaları evel bir çoq qırımtatarğa artıq berilgen edi. Olarnıñ arasında faaller, Rusiyede faaliyeti yasaq etilgen Qırımtatar Milliy Meclisiniñ azaları edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
