Qırımda bir buçuq yıl içinde Rusiye mahkemeleri "Rusiye ordusını itibardan tüşürüv maddesi" ile 409 qarar çıqarğanlar. Bunı sentâbrniñ 4-nde "QırımSOS" uquq qoruyıcı teşkilâtı haber etti.
"Bir buçuq yıl içinde işğal etilgen Qırımda "mahkemeler" "Rusiye ordusını itibardan tüşürüv maddesi" ile 409 qarar ve 3 qarar tekrar itibardan tüşürüv içün çıqardılar", - dep ayta Yevgen Yaroşenko.
Eñ çoq qarar Rusiyeniñ nezareti astında olğan Kiyev rayon mahkemesi çıqarğan - yüzde 62.47. Bundan ğayrı bu madde ile qararlarnı Yevpatoriya, Feodosiya, Yalta, Saki şeer mahkemeleri çıqarğan.
Aynı zamanda, avgustnıñ başında bu qararlarnıñ sayısı 389 edi, dep bildireler teşkilâtta.
Evel, Ukrayina baş prokurorı Andriy Kostin Qırımda 180-den çoq ukrayinalı siyasiy mabüs tutula, 2022 senesi mart ayından berli Rusiye ordusını «itibardan tüşürüv» manaçığınen eñ az 370 insan memuriy mesüliyetke çekildi, dep bildirgen edi.
Rusiyede ve işğali altındaki topraqlarda Ukrayina tarafdarları taqip etile. Rusiyege qoltutqan bloger Aleksandr Talipov Telegram kanalında Ukrayina tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını «itibardan tüşürgeninde» qabaatlanıp, memuriy ve cinaiy mesüliyetke çekile. Ukrayina prokuraturası Talipovğa qarşı «milletlerara nefret doğuruv» maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
