Arman ayınıñ 25-ne qadar işğal etilgen Qırımda RF ordusınıñ "itibardan tüşürüv" maddesine istinaden 1536 dava qayd etildi. Çoqusı allarda Rusiye mahkemeleri para cezaları aqqında qarar çıqardı, dep bildirdi Ukrayina prezidentiniñ Qırım Muhtar Cumhuriyetindeki temsilciligi.
1379 davada para cezasını belgileme ya da bir qaç davanı birleştirme aqqında qararlar çıqarıldı. Daa 49 dava baqıla.
Basqılarğa oğrağanlar arasında em qadınlar, em de erkekler bar. Statistik malümatqa köre, qararlarnıñ yüzde 51-i (707) qadınlarğa, yüzde 49-ı (669) ise erkeklerge ait.
Bundan ğayrı, arman ayınıñ 25-niñ malümatına köre 222 insan Qırım territoriyasında qanunsız apiste buluna. Olarnıñ çoqusı 133 insan qırımtatar halqınıñ vekilleri.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı olğan qırımlı bloger Aleksandr Talipov öz telegram kanalında Ukrayinağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar RF ordusını "itibardan tüşürüv" içün tutula ve memuriy ve cinaiy mesüliyetke çekile.