Ukrayina prokuraturası Rusiye tecavuzına açıq qol tutqan qırımlı ukrayin sportçusına qarşı qabaatlav aktını mahkemege yolladı. Bunı Qırım Muhtar Cumhuriyeti prokuraturasınıñ matbuat hızmeti bildire.
Qayd etilgenine köre, onıñ areketleri istilâcı devletke yardım etüv olaraq tanıla, oña 12 yılğa qadar apis cezası berile bile.
''Qabaatlanğan sabıq ukrain sportçusı, Avropa ve dünya sumo çempionı 2016 senesinden başlap Rusiye Federatsiyasınıñ milliy taqımında iştirak etken, amma Rusiye sportçularına halqara yarışlarda iştirak etmek yasaq etilgen soñ karyerasında teneffüs alğan edi'', – dep aytıla haberde .
Prokuraturada qayd etkenlerine köre, sportçu Qırımda RF ordusınıñ ihtiyacları içün para toplamaq maqsadınen göñülliler areketini teşkil etti ve yolbaşçılıq etti.
''Hususan, o, Rusiye arbiy hızmetçileri içün dizel generatorları, radiatorlar, issilik közeticileri ve diger resurslarnıñ satın alınması içün para topladı, olarnıñ arasında Bahmut şeerinde Ukrayinağa qarşı arbiy areketler alıp barğanlar bar edi", - dep qoştılar prokuraturada.
Qayd etilgenine köre, qadın Rusiye tarafdarı olğan matbuat vastalarında defalarca çıqışta bulunıp, Rusiye ikâyelerini ileriletken edi. Hususan, "mahsus arbiy operatsiya" ve "yarımadanı Ukrayina arbiy silâlı quvetlerden qorçalamaq" içün RF ordusına yardım etmek kerek olğanını bildirdi.
QMC prokuraturasınıñ haberinde şübeli qadınnıñ adı ve soyadı aytılmay, lâkin Qırım.Aqiqatqa medianen laf etmege aqqı olmağan ve adını bildirmege istemegen memur, söz Olga Davıdko aqqında ketkenini bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
