İşğal etilgen Qırımda Ukrayinağa qarşı cenkleşken Rusiye arbiylerine maddiy yardım köstermek içün memurlarğa yük arta. Bunı Qırım.Aqiqatqa #LiberateCrimea halqara kampaniyasınıñ qırımlı faalleri bildire.
Faallerniñ malümatına köre, Qırımda Rusiye memurlarını Rusiye ordularına yardım etmege mecbur ete ekenler.
"Evelden memurlar cenkni maliye etmek içün aylıqlarından belli bir miqdar ayırmaqnen sıñırlansa, şimdi ise er bir idare ya da icra akimiyet organı ve yerli öz-özüni idare etüv organı, olarğa aşayt malları, silâ ve çeşit türlü tehnikiy vastalar şeklinde maddiy yardım köstermek maqsadınen, cebede cenkleşken belli bir bölükke şeflik etmek mecburiyetinde buluna. Böyle malümat bizge çeşit menbalardan kele. Meselâ, Qırımnıñ rusiyeli ükümetinde qabarcılıqqa qarşı küreş komiteti Arbiy deñiz quvetleriniñ yalı ordusınıñ 22-nci ordu korpusı yalı mudafaasınıñ 126-ncı ayrı brigadasınıñ bölüklerini maddiy-tehnikiy teminlevde yardım ete. Bu, Rusiyeniñ resursları tez-tez tükenip ketkenini ve Kreml içün cenkni maliye etmesi qıyınlaşqanını köstere", — dep ayta faaller.
#LiberateCrimea qayd etti ki, böyleliknen Kreml daa "Qırımdaki biñlernen Rusiye memurlarınıñ ordusını Ukrayinada Putin rejiminiñ arbiy cinayetlerinde iştirakçi yapa".
Dekabrniñ 2-nde Qırımnıñ Rusiye parlamentiniñ spikeri Vladimir Konstantinov ilhaq etilgen Qırımda 2024 senesi Rusiye saylavları neticesinde teşkil etilgen yerli şuralarnıñ toplaşuvlarında tayinlengen Rusiye şeer ve rayon şuralarınıñ reislerine şeadetnamelerni berdi. Tedbirde Konstantinov Ukrayinada cenkleşken Rusiye ordularına yardımnı quvetleştirmek vazifesini qoydı. Bu munasebetnen bizim işimiz qurulğan, arbiylernen bağ qurulğan, biz er vaqıt olarnıñ isteklerine tez cevap beremiz. Bu işni yañı seviyege çıqarmaq, umumiy ğalebemizni yaqınlaştırmaq içün ğayretlerni birleştirmek kerek, dedi Konstantinov.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
