Aqmescitteki Rusiye kontrolindeki Kiyev rayon mahkemesi uquq qoruyıcı ve jurnalist Lutfiya Zudiyevanı "kütleviy haber serbestliginiñ bozuluvı" maddesine istinaden 2500 ruble para cezasına mahküm etti, dep haber ete "Qırım birdemligi".
"E" merkeziniñ hadimi Roman Filatov oña qarşı "kütleviy haber vastalarında çetel agentleri aqqında malümatnı ya da olar çıqarğan materiallarnı çetel agent statusını köstermeyip tarqatqanı içün" protokol tizdi.
Zudiyevanıñ aytqanına köre, mahkeme onıñ iştiragi olmadan qarar çıqarğan ve memuriy dava boyunca yazılı itirazlarnı baqmağan. Uquq qorçalayıcı, uquq bozuluvı subyekti olmağanını ve fizikiy şahıs olaraq talaplarnı yerine ketirmek mecburiyetinde olmağanını tüşüne, Qırımdaki Ekstremizmge qarşılıq kösterüv Merkeziniñ bölük yolbaşçısı Ruslan Şambazov ise onıñ Facebooktaki şahsiy saifesini qayd etilgen kütleviy haber vastalarına teñleştirdi.
"Yol qazası ve tıqanıqlıq sebebinden bir qaç daqqa keç qaldım. Advokat vastasınen mahkemecige haber ettim, amma o, bunı sayğısızlıq olaraq qabul etti. Mahkeme oturışına azırlağan ve seslendirmegen bütün delillerimni istinaf şikâyetinde kösterecem", - dedi Zudiyeva.
Uquq qoruyıcı, Rusiye Federatsiyasınıñ Memuriy cinayetler kodeksiniñ 13.15 maddesiniñ 2.1 qısmına binaen memuriy mesüliyetke yalıñız kütleviy haber vastalarınıñ muarririyetini ya da teşkilâtçısını, em de baş muarririni ya da diger resmiy şahısnı çekmek mümkün, dep bildirdi.
"E" merkeziniñ hadimleriniñ Rusiye Federatsiyası Memuriy cinayetler kodeksiniñ 13.15 maddesiniñ bu qısmına istinaden dava açmağa aqqı yoq edi. Bu protokolnı kütleviy haber vastalarını nezaret etüv saasında vekâletli organ tizmeli ve onı mahkeme organlarına baqmaq içün yollamalı", - dep ayttı oturıştan soñ advokat Emil Kurbedinov.
Kiyev rayon mahkemesi imayeciniñ bu delillerinen razı olmadı. Oturış 8 daqqa devam etti, dep qayd ete "Qırım birdemligi".
Fevralniñ 22-nde Canköyde Rusiye quvetçileri jurnalist ve uquq qoruyıcı Lutfiye Zudiyevanıñ evinde tintüv keçirdi. Onı, "Radio Svoboda" malümatını "yabancı agent" olaraq qayd etmeden yayınlağanı içün, "matbuat serbestligini qullanuvda" qabaatladılar. Lutfiye Zudiyeva "Qırım birdemligi" uquq qoruyıcı birleşmesiniñ koordinatorıdır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
