Rusiyeniñ nezareti astında olğan Aqmescitniñ Kiyev rayon mahkemesi keçende tintüvden soñ yaqalanğan Ruslan Asanov, Amethan Umerov ve Remzi Nimetulayevni eki ayğa tevqif etti. Bunı "Qırım birdemligi" cemaat birleşmesi haber etti.
Berilgen malümatqa köre, Nimetulayev ve Asanovğa Rusiye Ceza qanunnamesiniñ 205.5 maddesiniñ birinci qısmına binaen (terrorristik teşkilâtnıñ faaliyetini teşkil etüv), Amethan Umerov ise Rusiye Ceza qanunnamesiniñ 205.5 maddesiniñ ekinci qısmına binaen (terroristik teşkilâtnıñ faaliyetinde iştirak etüv) qabaatlanğan.
Bundan ğayrı avgustnıñ 25-nde Rusiye mahkeme keçende yaqalanğan daa üç faal Seydamet Mustafayev, Eldar Yakubov ve Abdulmecit Seytumerov içün sıñırlama tedbirini tayin etecek.
Avgustnıñ 24-nde Bağçasarayda ve Bağçasaray rayonında saat 4-te Rusiye quvetçileri qırımtatarlarnıñ Ruslan Asanov, Seydamet Mustafayev, Remzi Nemetulayev, Abdulmecit Seytumerov, Amethan Umerov ve Eldar Yakubovnıñ evlerinden tintüv keçirdi.
Evel Qırımtatar resurs merkeziniñ başı Eskender Bariyev 2023 senesiñ 6 ayı içinde 37 tintüv, olardan 29 qıırmtatatrlarnıñ evinde qayd etilgeni bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
