Qırımnıñ Rusiye kontrolindeki Kirov rayon mahkemesi imam İsmail Yurdamovnıñ qabaatını lâğu etti, o, "qanunsız missionerlik faaliyeti" içün evelden tizilgen protokol boyunca Yurdamovğa sekiz biñ rublelik para cezası berüv aqqında Kirov qasabasındaki halqara mahkemeniñ qararına imayeniñ istinaf şikâyetini qanaatlendirdi.
Bu aqta fevralniñ 19-nda "Qırım birdemligi" cemaat birleşmesi, Yurdamovnıñ imayecisi, adliyeci Rustem Kâmilevniñ malümatına atıf etip bildirdi.
''Bugün mahkemede İsmail Yurdamov añlattı ki, çoq yıl devamında Privetnoye köyünde köy sakinleriniñ ve şimdiki imamnıñ ricası ile bazı diniy merasimlerni keçire edi. Soñkisi sağlıq vaziyeti ve yaşı sebebinden öz vekâletlerini sıq-sıq özü bere edi. Mahkemeci Georgiy Tsertsvadze şikâyet arizasını qabul etip, onı tolusınen qanaatlendirdi. İsmail Yurdamovğa qarşı memuriy uquq bozuvı davası qanunsız olğanı içün qapatıldı", - dep aytıla faallerniñ haberinde.
Dekabrniñ 13-nde saba Yurdamovnıñ evinde tintüv keçirildi, bundan soñ onı polis bölügine alıp kettiler. O, Rusiye Federatsiyası Memuriy cinayetler qanunnamesiniñ 5.26 maddesiniñ dörtünci qısmına istinaden vicdan serbestligi, din serbestligi ve diniy birleşmeler qanunlarını bozğanında qabaatlandı.
İmamnıñ qızı Gülsum qayd ete ki, olarnıñ evinde keçirilgen tintüv babasınıñ Qırım siyasiy mabüslerine faal qoltutqanınen bağlı edi.
''O, Qırım ve Rostovdaki mahkemelerge sıq-sıq qatnay edi. Adaletsiz apiske alınğan qırımtatarlarnı qorçalamaq içün köyümizniñ qartları adından çıqışta bulundı. Bundan ğayrı, 20 yıldan ziyade cami imamı ola. Dua, nikâh merasimlerini keçire edi. İnsanlar oña er vaqıt suallernen kele edi", - dep bildirdi Gülsum.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
