Rusiye kontrolindeki Qırım Yuqarı mahkemesi Qırım sakinini Ukrayina Silâlı quvetlerinde hızmet etkeni içün ğıyabiy şekilde mahküm etti. ''Krıminform'' mahkeme matbuat hızmetine atıf etip yazğanına köre, onıñ areketleri devlet hainligi olaraq tanıla (Rusiye Federatsiyası Ceza kodeksiniñ 275-inci maddesi).
Berilgen malümatqa köre, erkek 2015 senesi Qırımnı terk etip, Ukrayinanıñ qıtaiy qısmına yol aldı, bundan soñ arbiy avağa qarşı mudafaa brigadalarından birine hızmetke kirdi ve Rusiye ordusına qarşı cenk areketlerinde iştirak etti. Bundan da ğayrı, haber etilgenine köre, o, Ukrayina prezidentinden mukâfat aldı.
''Devlet hainligi ile qabaatlanğan Rusiye Federatsiyasınıñ vatandaşına üküm çıqarıldı. Üküm ğıyabiy şekilde çıqarıldı, çünki mabüs federal ve halqara qıdıruvda buluna", - dep bildire Krıminform.
Rusiye mahkemesi tarafından mahküm etilgen qırımlınıñ adı ve soyadı bildirilmey, onıñ bu dava boyunca açıq izaatları yoq.
Keçken sene oktâbr ayında Rostov-na-Donu şeeriniñ Cenübiy okrugınıñ arbiy mahkemesi 23 yaşındaki Aluşta sakini Albert Kruglovnı Ukrayinağa "Azov" batalyonı erkânında cenkke ketmege tırışqanı içün sekiz yıl apis cezasına mahküm etken edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
