Qırımdaki Rusiye mahkemesi imam İsmail Yurdamovnı qabaatlı tanıp, "qanunsız missionerlik faaliyeti" içün evelden tizilgen protokolğa köre sekiz biñ ruble para cezasını berdi. Bu aqta ''Supilne'' ''Qırım birdemligi'' cemaat areketine atıf etip yaza, o, Yurdamovnıñ imayecisi advokat Rustem Kâmilevden izaat ala bildi.
''Ebet, mahkeme oturışında imam, cuma namazını ne içün qılğanını añlattı. O, buña halq tarafından yollanılğanını ayttı. O, mahkemege öz noqta-i nazarını bildirdi, amma, elbette ki, deliller diñlenmedi", - dep tarif etti Kâmilev.
Advokat, imayeniñ mahkeme qararına itiraz bildirmek niyetinde olğanını bildirdi.
Dekabrniñ 13-nde saba Yurdamovnıñ evinde tintüv keçirildi, bundan soñ onı polis bölügine alıp kettiler. O, Rusiye Federatsiyası Memuriy cinayetler qanunnamesiniñ 5.26 maddesiniñ dörtünci qısmına istinaden vicdan serbestligi, din serbestligi ve diniy birleşmeler qanunlarını bozğanında qabaatlandı.
İmamnıñ qızı Gülsum qayd ete ki, olarnıñ evinde keçirilgen tintüv babasınıñ Qırım siyasiy mabüslerine faal qoltutqanınen bağlı edi.
''O, Qırım ve Rostovdaki mahkemelerge sıq-sıq qatnay edi. Adaletsiz apiske alınğan qırımtatarlarnı qorçalamaq içün köyümizniñ qartları adından çıqışta bulundı. Bundan ğayrı, 20 yıldan ziyade cami imamı ola. Dua, nikâh merasimlerini keçire edi. İnsanlar oña er vaqıt suallernen kele edi", - dep bildirdi Gülsum.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
