Rusiye kontrolindeki Qırım Yuqarı mahkemesi beş balanıñ anası Esma Nimetullayeva, terbiyeci Nasiba Saidova, student Elviza Aliyeva ve iş adamı Fevziye Osmanovanıñ advokatlarınıñ şikâyet arizasını red etip, qırımlılarnı apiste qaldırdı. Bu aqta "Qırım birdemligi" cemaat birleşmesine advokat Emil Kurbedinov bildirdi.
Beyanatqa köre, oturışuvlar qızlarnıñ iştiraпi olmadan keçti, çünki olar boş aynıñ 23-nden berli mecburiy mahkeme-psihiatrik ekspertizasında bulunalar. Mahkeme qapalı şekilde keçirildi.
"Biz olarnı biraz körmege ümüt etip keldik, amma, yazıq ki, bu da olmadı", — dep tarif etti "Qırım birdemligi"ne Esma Muratova.
Orta küz ayınıñ 15-nde Rusiye quvetçileri Qırımda dört qırımtatar qadınını tutıp, olarnı Rusiye Ceza kodeksiniñ 205.5 maddesine istinaden (terror teşkilâtınıñ faaliyetinde iştirak etüv) "Hizb ut-Tahrir" davası boyunca qabaatladı.
Tutulğanlar arasında Esma Nimetulayeva, beş balanıñ anası ve siyasiy mabüsniñ apayı; Nasiba Saidova, bala bağçasında çalışqan student; Elviza Aliyeva ve Fevziye Osmanova.
Orta küz ayınıñ 16-nda Aqmescitteki Rusiye kontrolindeki Kiyev rayon mahkemesi dört kişini eki ayğa SİZO-ğa yolladı.
