Qırımda Rusiye mahkemesi mustaqil din cemiyetiniñ imamı Yusuf Aşirovnıñ davasını baqmağa başladı. "Qırım birdemligi" haber etkenine köre, oturışta imamğa ürmetlerini bildirgen yerli cemaatçılarnıñ şaatları sorğuğa çekildi.
Mahkeme RF Memuriy uquq bozuvları qanunnamesiniñ 5.26 maddesiniñ 5-inci qısmına istinaden memuriy uquq bozuvnı baqmağa başladı - çetel vatandaşı ya da vatandaşlığı olmağan şahıs tarafından vicdan serbestligi, din serbestligi ve diniy birleşmeler qanunlarını bozıp, missionerlik faaliyetini kerçekleştirüv.
Advokat Nazim Şeyhmambetovnıñ aytqanına köre, bu davanıñ esas sebebi şunda ki, 2023 senesi noyabrniñ 23-nde, Aşirovnıñ camide cuma namazını qılmaq arfesinde, Rusiye quvetçileri imamnıñ evine kelip, onı eki künge apiske aldı.
Ertesi künü camige, Rusiye quvetçileriniñ yardımınen, Aşirovnıñ yerine başqa imam qoyuldı. Aynı zamanda, imamnıñ faaliyeti bütünley qanuniy olğanı içün, advokat qabaatlavlarnı esassız dep saya.
"Müvekkilimniñ qayd etkenine köre, imamnıñ vazifesi cuma künleri yalıñız ders bermege kelmek degil. Bu adam yerli sakinler arasında yaşay ve olarnıñ yaşayışını bile, kederlerini ve quvançlarını paylaşa. Bu ise, cuma künü cuma vaazından daa paalı. Bu sebepten insanlar onı ürmet ete, ve bugün mahkemede bunı ayttılar", - dedi Şeyhmambetov.
Öz nevbetinde, Aşirov, onıñ imam vazifesinden boşatılmasında Rusiye devlet erbapları iştirak etkenini bildirdi.
Nevbetteki oturıv fevralniñ 7-ne planlaştırılğan.
Noyabrniñ 23-nde Rusiye quvetçileri tintüvler keçirip, ''Aluşta'' musulman din cemiyetiniñ üç azasını tuttılar: Yusuf Aşirov, Vilen Усеinov ve Zinur Appazov. Neticede, Aşirov eki künlik, Усеinov - 10 künlik, Appazov - 5 künlik apis cezasını aldı.
Daa soñra Rusiye quvetçileri Aluştadaki musulman diniy cemiyetiniñ reisi Abdul Gafarovnıñ evinde tintüv keçirdi, bundan soñ "Ekstremizmge qarşılıq kösterüv merkeziniñ" hadimleri Abdul Gafarovnı Aluştadaki Rusiye politsiyasınıñ bölügine alıp ketti. Oña qarşı RF Memuriy cinayetler qanunnamesiniñ 20.29 maddesine köre memuriy protokol tizildi (Federal ekstremist materiallar cedveline kirsetilgen ekstremist materiallarnıñ kütleviy darqatıluvı, em de olarnı kütleviy darqatıluv maqsadınen azırlav ya da saqlav).
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
