Rusiye Federatsiyası nezareti astındaki Aluşta şeer mahkemesi ''Aluşta'' musulman diniy cemiyetine camide islâm din erbaplarınıñ kitaplarını saqlağanları içün 100 biñ ruble para cezasını berdi, dep bildire ''Qırım birdemligi'' cemaat birleşmesi adliyeci Rustem Kâmilevge atıf etip.
Onıñ aytqanına köre, Rusiye mahkemesi "ekstremist malümat tarqatıluvı" maddesine istinaden qarar çıqardı (Rusiye Federatsiyası Memuriy cinayetler qanunnamesiniñ 20.29 maddesi). Muvafıq protokol Rusiye quvetçileri tarafından noyabrniñ 30-nda - camide tintüv keçirilgeninden bir afta keçken soñ tizildi. Aynı protokolğa noyabrniñ 30-nda ''Aluşta'' cemiyetiniñ reisi Abdul Ğafarovdan alınğan neşirler de kirdi. Onıñ aytqanına köre, kitaplarnıñ bir qısmı camide yoq edi, amma bir aftadan soñ evinde tintüv vaqtında tutıp alındı.
Söz beş neşir aqqında kete: ''İslâm, İman, İbadet'' Osman Nuri Topbaş, ''Zikirniñ qıymeti'', ''Muhammed Peyğamber-2'', ''Halifelik tarihı'' Abu Bakr as-Sıddik, ''Halifelik tarihı'' Ali ibn Abu Talib kitapları.
"Bu para cezasını din cemiyetimizge qarşı basqı olaraq körem", - dep izaatladı Rusiye mahkemesiniñ qararını cemiyet reisi Abdul Gafarov.
Noyabrniñ 23-nde Rusiye quvetçileri tintüvler keçirip, ''Aluşta'' musulman din cemiyetiniñ üç azasını tuttılar: Yusuf Aşirov, Vilen Усеinov ve Zinur Appazov. Neticede, Aşirov eki künlik, Усеinov - 10 künlik, Appazov - 5 künlik apis cezasını aldı.
Daa soñra Rusiye quvetçileri Aluştadaki musulman diniy cemiyetiniñ reisi Abdul Gafarovnıñ evinde tintüv keçirdi, bundan soñ "Ekstremizmge qarşılıq kösterüv merkeziniñ" hadimleri Abdul Gafarovnı Aluştadaki Rusiye politsiyasınıñ bölügine alıp ketti. Oña qarşı RF Memuriy cinayetler qanunnamesiniñ 20.29 maddesine köre memuriy protokol tizildi (Federal ekstremist materiallar cedveline kirsetilgen ekstremist materiallarnıñ kütleviy darqatıluvı, em de olarnı kütleviy darqatıluv maqsadınen azırlav ya da saqlav).
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
