Qırımda Rusiye quvetçileri tarafından Qırım yarımadasında "terakt azırlağanından" şübeli sayılğan eki insan tutuldı. Bu aqta Rusiye ve Qırım kütleviy haber vastaları FSB matbuat hızmetine atıp etip bildire.
Berilgen malümatqa köre, Aqmescit sakini 2023 senesi mayıs ayında Aqmescit rayonında demiryolnı patlatmaqta "ukrayin diversantlarına yardım etkeninde" ve naqliyat obyektinde diversiya azırlağanında qabaatlana. Daa bir yaqalanğan kişi, Ukrayina mahsus hızmetleriniñ avalesi ile Rusiye arbiy hızmetçisine qarşı terakt azırlağanında şübeli sayıla.
Tutulğanlarnıñ adları ve soyadları bildirilmey, olarnıñ açıq mevamı bildirilmey. Ukrayina mahsus hızmetleri bu beyanatlarnı izaatlamadı.
Qırımnıñ Aqmescit rayonındaki demiryolunda vaqia keçken sene mayıs 18-de yüz berdi. O vaqıt yük poyezdi relsten çıqtı. Qırımnıñ Rusiye parlamentiniñ spikeri Vladimir Konstantinov Aqmescit civarındaki demiryolunda vagonlarnıñ tüşmesi ile bağlı vaqianı "patlav" dep adladı ve Ukrayinanı qabaatladı. Ukrayina istihbaratı, Rusiye arbiyleri bu demiryolnı silânı taşımaq içün qullana, dep bildirdi, Ukrayina Mudafaa nazirliginiñ istihbarat baş idaresiniñ spikeri Andriy Yusov ise, bu vaqia aqqında aytqanda, demiryolları "çıqmadı, yoruldı ve şimdi vaqtınca çalışmay", dep bildirdi.
Qırımda ve Aqyarda 2014 senesinden başlap eñ azından 16 Ukrayina vatandaşı "casuslıq" ve "diversiya"da qabaatlanıp mahküm etildi. 2015 senesi Rusiye mahkemesi rejissör Oleg Sentsovnı 20 yılğa üküm etti. Rusiye quvetçileri "diversiya"nı "Hizb ut-Tahrir" islâm siyasiy teşkilâtınıñ vekillerine de yükley. Rusiyeniñ Ukrayinağa tam miqyaslı istilâsı başlağan soñ yarımadada cenk ile razı olmağanlarnıñ episi kütleviy surette taqip etile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
