Ukrayina prezidentiniñ Qırım Muhtar Cumhuriyetindeki temsilciliginde Qırımnı işğalden qurtaruv Şurasınıñ doquzıncı toplaşuvı olıp keçti, bu 2025 senesinde birinci toplaşuvdır.
Qırım.Aqiqat mühbiri bildirgeni kibi, tedbirde Qırımnı işğalden qurtaruv Şurasınıñ azaları, Ukrayina halq deputatları, devlet akimiyet organlarınıñ, nazirlik ve müessiselerniñ, Qırımtatar Milliy Meclisiniñ vekilleri, cemaat, ilmiy ve ekspert müitiniñ vekilleri, jurnalistler iştirak etti.
Prezidentniñ Qırımdaki temsilcisi vazifesini eda etken Ölğa Kurişko, Şuranıñ 2024 senesi semereli çalışqanını qayd etti, hususan Qırımnı işğalden qurtaruv strategiyasınıñ ve "Qırımnı işğalden qurtaruvdan soñ Ukrayina devletiniñ prioritet adımları" vesiqasınıñ işlep çıqarılmasını qayd etti, em de 2025 senesi Şura ögünde turğan çağıruvlarnı qayd etti.
Oturışuvda Qırımdan ukrayin arbiyleriniñ, Ukrayinanıñ diger qorçalayıcılarınıñ hatırasını añma meselelerine ayrı diqqat ayırıldı. Şura iştirakçileri elâk olğan ukrayin qorçalayıcılarınıñ, hususan işğal sebebinden öz cemaatlarında añılmaycaq olğanlarnıñ hatırasını ebediyleştirüv mehanizmlerini işlep çıqarmaq kerekligini qayd ettiler.
Bundan da ğayrı, Qırımtatar Milliy Meclisiniñ reisi Refat Çubarov Qırım toprağında Rusiye Ukrayinağa qarşı cenkte elâk olğan Rusiye arbiyleriniñ qanunsız şekilde añılması, defin etilmesi, abideler, hatıra levhaları qoyulması, soqaq ve diger coğrafik obyektlerniñ adlarınıñ deñiştirilmesi meselesini köterdi.
Ukrayina prezidentiniñ Qırım Muhtar Cumhuriyetindeki temsilciliginiñ informatsion teminlevi bölüginiñ reberi Yevğen Bondarenkonıñ qayd etkenine köre, iş meseleleri arasında prezident temsilciligi Ukrayina milliy hatıra institutı ile beraberlikte Qırımda Rusiye akimiyeti tarafından qoyulğan hatıra işaretleriniñ yıqıluv meselesini al ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.