Dekabrniñ 9-nda işğal etilgen Qırımda Rusiye bayramı — Vatan qaramanları kününi qayd eteler. Keçken aftanıñ başından çeşit tedbirler, şu cümleden "SVO" (Rusiye Federatsiyası Ukrayinağa qarşı cenkni böyle adlandıra — QA) iştirakçilerini añma tedbirleri keçirilmege başladı, dep haber ete Qırım.Aqiqat mühbiri.
#LiberateCrimea halqara kampaniyasınıñ qırımlı faalleriniñ qayd etkenine köre, Qırımda Rusiye akimiyeti arbiyler kultunı inkişaf ete.
"Qırımda cemiyet keniş mıqyaslı, şu cümleden ruhiy ceetten ve bala bağçası talebelerinden başlap, nefaqacılarğa qadar — bütün seviyelerde askeriyleştirilmekte. İşğal etilgen Qırımnıñ Rusiye akimiyeti arbiyler kultını yaratıp, olardan qaraman obrazını şekillendire. Qırımğa yerleşken 56-ncı gvardiya desant-ücüm polkunıñ 12 askeriniñ Rusiye Qaramanı unvanı bar. Bu qaramanlıqnı, qırımlılarnı aqıldan tüşürgen, Qırımda endi eki yüzden ziyade olğan "SVO" iştirakçilerine qol tutmaq içün bir çoq göñülli merkezlerde şahsiy kâr qazanğan professional "vatanperverler" qullanalar! Rusiyede genç ordusınıñ saflarını toldurğan bala-gençlik arbiy-vatanperver klubları öse. Bildirilgenine köre, "Bars-Krım" askerleriniñ sayısı arttırıla bile. Bütün bular — Rusiye Mudafaa nazirligine kontraktlılarnı celp etmek planını yerine ketirmek içün, degen tek bir maqsat içün yapıla", — dep, Qırım.Aqiqatqa faalleri vaziyetni izaatladı.
Dekabrniñ 9-nda qomşu Rusiyede Vatan qaramanları kününi qayd eteler. Bu kün 2007 senesi fevralniñ 28-nde qabul etilgen Federal qanun ile tasdıqlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
