İşğal etilgen Qırımda Ukrayinanı desteklegen Vernadskiy adına QFU studenti yaqalanğan. Bunı Qırımda yaşağan rus blogeri Aleksandr Talipov bildirdi. Onıñ sözlerine köre, student onıñ mektübi sabıq millet vekili, "Azatlıq" Bütün Ukrayina birleşmesiniñ azası İrina Farionnıñ telegram kanalında yayınlanğan soñ yaqalanğan.
"İrina Farion Telegram kanalında Qırımda yaşağan student Maksim Glebovnıñ oña yazğan mektübiniñ fotosını paylaştı. Şu mektüpte Maksim Farionnı ateşli rusofobiyasını desteklegenini bildire. Mektüpte adı ve soyadı bar edi, Keriçten olğanı ve Aqmescitte oquğanı yazılı edi", - dep yazdı Talipov.
Söz "İrina Farion" telegram kanalında İrina Farionğa destek mektübi yayınlanğan yazı aqqındadır. Maksim Glebov adından kelgen mektüpte yollağan insan Keriçten olğanı ve Aqmescitte oquğanı yazıla.
Maksimniñ Farionnıñ yayınından soñ yaqalınıp yaqalanmağanını belgilemek imkânsızdır. Farion özü bu vaqianı izaatlamadı. Muarririyet onen bağlanmağa tırışa.
Rusiyede ve işğal etilgen topraqlarda Ukrayinanı desteklegen faallerniñ taqip etilmesi devam ete. Rusiyege qoltutqan bloger Aleksandr Talipov Telegram kanalında Ukrayina tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını "itibardan tüşürgeninde" qabaatlanıp, memuriy ve cinaiy mesüliyetke çekile. Ukrayina prokuraturası Talipovğa qarşı "milletlerara nefret doğuruv" maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
