Qırımda Yalta civarındaki Qızıltaş köyünde quvetçiler eki qırımtatar Emil Nazarbekov ve Arsen Cepparovnı yaqaladı ve bellisiz tarafqa alıp ketti, dep haber ete "Qırım birdemligi" cemaat birleşmesi.
"Ekisi de sentâbrniñ 26-nda yaqalandı. Kündüz saat ekilerde Emil Nazarbekovnı evine ketirdiler. Yedi polis hadimi edi. Olardan üçü maskalı ve dörtü maskasız. Daa beş şaat bar edi. Tahqiqat areketleri aqqında protokolnı tek Emilge oqudılar. Soñra quvetçiler odalarnı dolaşıp başladı. Er bir dolapqa kirip çıqtılar, sebep ne eken - narkotik ve silâ qıdıra ekenler. Bundan soñ protokol imzalamağa mecbur ettiler ve bellisiz tarafqa alıp kettiler", - dep yazıla bildirmede.
Bundan ğayrı, "Qırım birdemligi"niñ mühbiriniñ sözlerine köre, Emil Nazarbekov angi polis bölügine alıp ketilgeni aqqında tanışlarına haber etip olamağan, quvetçiler yasaq etkenler. Al-azırda qorantası bulunğan yerini bilmey.
Siyasiy mabüs Arsen Cepparov kündüz saat üçlerde tükânğa ketkende yaqalanğan. Yanına araba kelip toqtağan, silâlı adamlar çıqıp onı yerge yatqızğanlar. Bütün bularnı olar kamerağa çekkenler. Soñra Cepparovnı arabağa oturtıp alıp ketkenler. Onıñ da bulunğa yeri belli degil.
Sebep belli degil. Rusiye polisi yaqalavlar aqqında resmiy malümat bermey.
Aprelniñ 17-nde 7 yıl devam etken apis müddetinden soñ Arsen Cepparov azatlıqqa çıqtı. Cepparov 2016 senesi aprelniñ 18-nde tutuldı. «Qırım birdemligi» qayd etkenine köre, apiske alınmazdan bir ay evelsi FSB hadimleri işine kelip, işbirligine zorlaycaq edi. Cepparov başqa insanlarnı çaqmaq kerek edi. Red etse, cinaiy dava açılır, dep qorquzğanlar.
Cepparov razı olmadı ve işten çıqarıldı. 2016 senesi aprelniñ 18-nde Aluşta rayonınıñ Qızıltaş köyünde evinde tintüv keçirildi. Cepparovnıñ davası daa evel tutulğan Refat Alimov, Muslim Aliyev, Enver Bekirov ve Vadim Siruknıñ davasınen birleştirildi. Aq qorçalayıcılar oña «Yaltadaki Hizb ut-Tahrir gruppası» adını berdi.
2019 senesi noyabrniñ 12-nde Cenübiy okrugınıñ arbiy mahkemesi (Rostov-na-Donu) Cepparovnı 7 yılğa üküm etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
