İlhaq etilgen Qırımda RF ordusınıñ "diskreditatsiyası" maddesine istinaden 1126 makeme materialı qayd etildi. Bu aqta Ukrayina Prezidentiniñ Qırım Muhtar Cumhuriyetindeki temsilciligi haber ete.
"Rusiye Federatsiyası Memuriy cinayetler kodeksiniñ 20.3.3 maddesine istinaden makemelerge vaqtınca işğal etilgen Qırımnıñ territoriyasında 1126 dava qayd etildi. Olardan 993 davada memuriy ceza şeklinde qarar çıqarıldı ya da diger maddelerge istinaden diger davağa qoşuldı ve umumiy qarar çıqarıldı", — dep aytıla haberde.
Qayd etilgenine köre, 42 davanıñ baqılması devam ete.
2024 senesi noyabr ayınıñ soñunda Qırım sakinlerine qarşı RF ordusınıñ "diskreditatsiyası" içün açılğan 1093 dava aqqında haber etilgen edi. Olardan 955-inde memuriy ceza şeklinde qarar çıqarıldı.
Rusiye Federatsiyasına ve onıñ tarafından işğal etilgen topraqlarğa tam miqyaslı istilâ başlağan soñ, Rusiye ordusınıñ "diskreditatsiyası" aqqında Memuriy cinayetler kodeksinde 20.3.3 maddesi peyda oldı. Rusiye-Ukrayina cenki aqqında malümat tarqatqanları ve Kremlniñ noqta-i nazarına zıt kelgen er angi fikir bildirgenleri içün taqip etile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
