İşğal etilgen Qırımnıñ Canköy rayonınıñ İzumrudnoye köyünde "Barbaros" restoranınıñ hadimleri rusiye arbiylerine hızmet etmeden red ettiler. Bunı RF arbiylerinden birine atfı etip Rusiyege qoltutqan bloger Aleksandr Talipov haber etti.
"2023 senesi iyülniñ 1-nde meni, omür arqadaşımnı ve daa bir qaç dostumnı Canköy rayonınıñ İzumrudnoye köyündeki "Barbaros" restoranına kirsetmediler. Sebep, menim ve arqadaşlarımnıñ arbiy urbada olğanımız edi. Başta restoran hadimleri bizge kirüv yasaq olğanını ayttılar, soñra yalan aytıp, bizim ögümizde masalarnı yedeklege başladılar", - dep alıntı ketire Talipov arbiyniñ sözlerinden.
Talipov Rusiye quvetçilerinden işbu restoranda teşkerüv keçirmesini talap ete. Restorannıñ müdiriyetiniñ bu vaqiağa dair izaatı şimdilik yoq.
Rusiyege qoltutqan bloger Aleksandr Talipov Telegram kanalında Ukrayına tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını «itibardan tüşürgeninde» qabaatlanıp, memuriy ve cinaiy mesüliyetke çekile. Ukrayına prokuraturası Talipovğa qarşı «milletlerara nefret doğuruv» maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
