Qırımda Rusiye quvetçileri dört qırımtatarnı tuttı, dep haber ete "Qırım birdemligi". Malümatnı aq qorçalayıcı Lutfiye Zudiyeva da tasdıqladı.
Onıñ aytqanına köre, saba saat 4-te FSB hadimleri Emir Kürtnezirov, Abibulla Smetlâyev, Rustem Mustafayev ve Mirzali Tacibayevniñ evlerine tintüvlernen kelgen.
"29 yaşında agronom Emir Kürtnezirov (2024 senesi martnıñ 5-nde FSB hadimleri babası Remzi Kürtnezirovnıñ evinde tintüv keçirdi) . 33 yaşındaki Abibulla Smedlâyev (dört çağına yetmegen balanıñ babası), 37 yaşındaki santexnik Rustem Mustafayev (üç çağına yetmegen balanıñ babası). Saba saat yedide soy-sopları bildirgenine köre, İslâm Terek rayonınıñ Yarkoye Pole qasabasında 44 yaşındaki aşçı Mırzaali Tajibayevniñ evinde tintüv keçirildi", — dep yazdı Zudiyeva.
Aq qorçalayıcılar, dört qırımtatarnıñ episi şimdi tahqiqat tedbirleri keçirilmesi içün Aqmescitteki FSB idaresine alıp ketirile, dep bildire.
"Qapunı parlap kirdiler, aqayım ve men eşitmedik. Aqayımnı uyattılar, men ise endi seslerden uyandım. Vesiqanı oqudılar ve tintüvni başladılar. Oğlumnıñ hastalığı bar, diagnozı bar, dep ayttım, özüni yahşı tutmalarını rica ettim. Soñra, aqayımnı uzaqqa alıp ketkenlerini ayttılar, duş almaq ve namaz qılmaq içün izin berdiler. Vesiqalarnı bütünley teşkerdiler, garajda maşnanı baqıp çıqtılar, çardaqnı da teşkerdiler. Aqayım bir şey imzalamadı, advokat yanında izaat berecegini ayttı", — dep tarif etti Rustem Mustafayevniñ qadını Şefiha.
FSB temsilcileri tutulğanlarğa kitaplar taşladı, dep haber ete "Qırım birdemligi".
"Birden divanda eki kitapçıq peyda oldı — evimizde olmağan kitaplar. Aqayım ve men evimizdeki er şeyni bilemiz, er şeyni bilemiz. Ve biz içün bu şaşılacaq bir şey edi — bu kitaplar bizde yoq edi", — dep ayttı Liniza Smedlâyeva, tutulğan Abibulla Smedlâyevniñ qadını.
Onıñ aytqanına köre, quvetçiler tintüvge gece saat üçlerde başlağanlar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
Qırımlı jurnalist ve faallerniñ evlerinde keçirilgen tintüvler
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.