Rusiye quvetçileri qırımtatar faalleri Aziz Karahalilov ve Arsen Yakubov, “Qırım birdemligi” cemaat birleşmesiniñ koordinatorı Mustafa Seydaliyev ve mühbiri Emin Rustemovnı ziyaret etip, olarğa “Qırım Cumhuriyetinde yüksek azırlıq vaziyeti” rejiminiñ tayin etilmesi sebebinden mitingler keçirilmesiniñ ve ziyaret etilmesiniñ yasaq etilmesi aqqında tenbi vesiqasını berdiler.
Bu aqta Qırım.Aqiqatqa “Qırım birdemligi” cemaat birleşmesi haber etti.
Rustemovnıñ sözlerine köre, aqşam saat 7-lerde evine grajdan urbasında ve özüni tanıtmağan polis hadimleri kelgen.
“Memleketteki (qomşu Rusiyede – QA) vaqialarnı közetedirsiñiz. Türlü mitingler, insanlarnıñ keñiş toplantıları yasaq, bir kişilik piketler ise yasaq degil”, – jurnalist quvetçiniñ sözlerinden alıntı ketirdi.
Polis hadimleri resmiy kâğıt imzalamağa berip, ketkenler.
“Vesiqada Qırım Cumhuriyeti başınıñ “Qırım Cumhuriyetinde yüksek azırlıq vaziyeti rejiminiñ tayin etilmesi aqqında” fermanına atfı etile. Oña köre bütün kütleviy toplaşuvlar yasaq. Bundan ğayrı vesiqada ekstremist faaliyeti ve mesüliyet aqqında yazıla”, – aytıp berdiler birleşmede.
“Qırım birdemligi” cemaat birleşmesiniñ koordinatorı Mustafa Seydaliyev, vesiqanı imzalamağanı, amma tenbi evinde qalğanını bildirdi.
Qırım boyunca Rusiye İİN idaresi ziyaretlerniñ sebepleri aqqında iç bir şey bildirmedi.
