İşğal etilgen Qırımda quruğan ya da suvu az olğan özenlerni kanalizatsiya aqımlarını tökmek içün qullanalar, dep bildire Qırım.Aqiqat mühbiri #LiberateCrimea halqara areketiniñ Qırım bölügine atıf etip.
Faallerniñ malümatına köre, bu aqta haberler yarımadanıñ bir çoq şeerinden kele.
"Qırım şeerlerinde ve Qırım paytahtında meraqlı bir vaziyet közetile — şeer sıñırında özenniñ yuqarı derecesinde olar aman-aman qurudı, şeer sıñırından aşağı ise özen kibi körüne, amma küçlü bir qoqu ile. Meselâ, Qırımnıñ baş özeniniñ — Salğırında, Aqmescit suv anbarınıñ barajından aşağı suv aman-aman yoq, amma şeerde özen mucizeviy şekilde suv toplay, Kiçik Salğırda da aynı vaziyet. Çoq yürmek kerekmey, tam Salğırdaki Kirov soqağındaki köpürniñ yanında borulardan suv aqıp kele, ve bu yerde qoqusı pek fena", — dep tarif ettiler Qırım faalleri.
Qayd etilgenine köre, Rusiye akimiyeti bu kibi problemlerge tek haber seslenüvinden soñ cevap bere.
"Misal içün, Sudaqta avgust ayı devamında yerli özenniñ qoqusı kele, amma içtimaiy ağlarda fotoresimler ve videolar derc etilgenden soñ, Rusiye tabiat qoruyıcı prokuraturası kirişti, yerli akimiyet problemni tanıdı. Aynı vaziyet Kefede de, bir çoq başqa şeerlerde de. Özenler az-çoq tolu olğanda, aqıntılar suvnıñ umumiy miqdarında o qadar körünmey edi, şimdi ise problem açıqtan-açıq kösterile ve onıñ qorqunçlı miqyası körüne", — dep qayd ettiler #LiberateCrimea Qırım bölüginde.
Haber etilgeni kibi, Qırımda qurğaqlıq ve sıcaq sebebinden özen ve suv anbarları quruy.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
