Tünevin Qırımda 11 yañı koronavirus hastası qayd etildi, dep bildirdi Qırımnıñ Rusiye yolbaşçısı Sergey Aksenov.
«Dört hasta çetelden keldi, 3 hasta tibbiy yardım içün muracaat etkende qayd etildi, 2 hastanıñ daa evel hastalanğanlarnen alâqası oldı, 2 hasta sağlam insanlarnıñ skriningi neticesinde belli oldı», – dep yazdı o, "VKontakte" içtimaiy ağında.
Onıñ malümatına köre, Qırımda 900 yañı koronavirus hastası qayd etildi. 59-i çetelden keldi, 100-i qomşu Rusiyeden kelgenler ve olarnen alâqada olğanlar.
Qırımda iyül 13-ünde 11 yañı koronavirus hastası qayd etilgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
