Rusiye kontrolindeki Aqmescitniñ Kiyev rayon mahkemesiniñ qadısı Olga Kuznetsova Qarasuvbazardaki «Hizb ut-Tahrir davasınıñ» mabüsleri Enver Ömerov, Riza Ömerov ve Ayder Cepparovnıñ sıñırlav tedbirini uzattı.
Qırım.Aqiqat mühbiriniñ bildirgenine köre, dava mabüsleri SİZOda 2020 senesi aprelniñ 5-ne qadar qalacaq. Bu aqta Riza Ömerovnıñ qız qardaşı ve Enver Ömerovnıñ qızı Fatma İsmailova Qırım.Aqiqatqa tarif etti.
«Oturışuv Qapalı oldı. Qarar seslendirilgende bile bizni kirsetmediler. Qarar aqqında advokattan malümat aldıq. Sağlıq vaziyetini aytsaq, babamnıñ tibbiy teşkerilüvine dair qarar azır. Faqat SİZO hadimleri esnasnı belli olmağan sebeplerden soza. Qardaşım Riza tiş ekimine baqtırılmalı. Vaziyet aynı: qarar bar, amma ekimge onı öyle de alıp ketmediler», – dep aytıla haberde.
2019 senesi iyünniñ 10-nda Aluşta, Qarasuvbazar ve Aqmescit rayonlarında keçirilgen tintüvlerden soñ 8 kişi tutuldı: Ruslan Nagayev, Eldar Kantimirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye FSBsi, tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) açılğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı, dep bildirdi. Ukraina uquq qoruyıcı organları Rusiye quvetçileriniñ Qırımda keçirgen tintüvleri sebebinden cinaiy tahqiqat başlattı.
Ukraina Tış işler nazirligi, Qırımdaki apiske aluvlarğa qarşı narazılıq bildirip, Rusiyege qarşı siyasiy, iqtisadiy ve sanktsiyalar basqısını quvetleştirmege çağırdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
