Qırımda oktâbrniñ soñuna qadar Rusiye uquq qoruyıcıları «vicdan serbestligi, din ve diniy birleşme serbestligi» maddesine köre diniy teşkilâtlar ve azalarına qarşı 101 memuriy dava açtı. Bu aqta Qırım aq qorçalayıcı gruppası haber ete.
Bu davalar çerçivesinde eñ az 1 340 500 rublege para cezaları berildi.
Oktâbr ayında Rusiye kontrolindeki Qırım mahkemelerine diniy teşkilâtlarnıñ azalarına qarşı 5.26 maddesiniñ 4-ünci qısmına istinaden (qanunsız missionerlik faaliyeti) eki yañı memuriy dava berildi. Birisi – cuma namazını qıldırğanı içün imam Ablâkim Galiyevge qarşı.
Martnıñ 2-nde Rusiye kontrolindeki Aqmescitniñ Mirovoy mahkemesi aqmescitli imam Rasim Dervişevni «qanunsız missionerlik faaliyetinde» qabaatlap, 5 biñ ruble para cezasını berdi.
Avgustnıñ 14-nde Rusiye kontrolindeki Aluşta şeer mahkemesi advokatlar Rustem Kâmilev ve «qanunsız missionerlik faaliyetinde» qabaatlanğan imam Yusuf Aşirovnıñ istinaf şikâyetlerini baqmadı. Aşirovğa 5 biñ ruble para cezası berildi.
Yarımadada «qanunsız missionerlik faaliyeti» sebebinden taqip etilgen imamlar Rusiye ile işbirligi yapqan Qırım musulmanları diniy idaresine boysunmay.
