İşğal etilgen Qırımda qadınlarnıñ zorbalıqnen ğayıp oluv adiseleri arta, dep bildire "Krım.SOS" aq qorçalayıcı teşkilâtı.
"Eñ telükeli tendentsiyalardan biri Rusiye FSB-sınıñ repressiyalarınıñ sistematik aleti olğan zorbalıqnen ğayıp oluvlarnıñ artmasıdır. Er yıl onlarnen insan ğayıp ola. Qurbanlarnıñ arasında qadınlarnıñ sayısı ep arta. Aman-aman bir yıl evelsi qaçırılğan Lera Cemilova ve Tatyana Dyakunovskayanıñ taqdiri alâ daa belli degil. Hersonlı student Anna Yeltsovanıñ ikâyesi de nümüneviydir, Rusiye akimiyeti onı bir yıllar devamında bir qabaatlavsız tuttı", — dep haber ete "Krım.SOS" eksperti Artem Oleynik.
Aq qorçalayıcılar mecburiy ğayıp etüvler insan aqlarınıñ qaba bozuluvıdır ve Rusiye memuriyeti tarafından ealini qorquzmaq içün qullanıla, dep qayd ete.
"Krım.SOS" qayd etkenine köre, 2024 senesi eñ azından 6 yañı zorbalıqnen ğayıp oluv adisesi qayd etildi: 2 erkek ve 4 qadın.
Daa evel Qırımtatar resurs merkezi bildirgenine köre, Qırım işğaliniñ yıllarında aq qorçalayıcılar 61 insannıñ ölümini qayd etti, 29-ı - qırımtatar halqınıñ vekilleri. Umumen, 2017-2024 seneleri devamında işğal etilgen Qırımda 10 018 insan aqlarınıñ bozuluvı qayd etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
