Qırımda qızamıq çıqqanlarnıñ sayısı artmağa devam ete – yıl başından yarımadada 38 qızamıq hastası qayd etildi. Bu aqta Rospotrebnadzor idaresiniñ matbuat hızmeti bildirdi.
Eñ çoq hasta Aqmescit, Bağçasaray ve Aqyarda qayd etilmekte.
«Hastalıq pek yuqunçlı olğanı içün ve yuqunçlı olması uzun müddet saqlanğanı içün yarımadada qızamıqnıñ qırğınlıq seviyesi qayd etilgen edi. Ailelerde aşı olmağanlardan sebep infektsiya tarqala», – dep bildire matbuat hızmeti.
Martnıñ 6-nda Rospotrebnadzor 2019 senesiniñ başından Qırımda laboratoriyada isbatlanğan 36 qızamıq hastası aqqında bildirdi. Bu raqam keçken sene qayd etilgen seviyege yaqınlaştı. Eñ çoq Aqmescit, soñra Bağçasaray, Aqyar, Canköy, Qurman ve Aqmescit rayonlarında qızamıq hastaları qayd etilmekte.
2018 senesi Dünya sağlıq teşkilâtı Avropada qızamıq hastalığınıñ rekord seviyesine çıqqanını qayd etti. Birinci 6 ayda 41 biñ insan qızamıq oldı, soñki 10 yılda er yıl olğanından daa ziyade.
Qızamıq bir insandan başqasına öksürik, sıqı şahsiy bağlarda keçe. Virus bir yerde eki saat devamında faal qala ve avada saqlana. Başta hastanıñ suvuqlanuv alâmetleri ola: tımav, sıcaq, öksürik, tahminen bir aftandan tökme çıqa (başta, soñra ise – vucutnıñ ust ve alt qısımlarında). Qızamıq ağırlaşuvları arasında – siñir sistemasına zarar ketirüv, pnevmoniya, otit, közlerniñ zayıflaması.
