Qırımda yarımadada qızamıq profilaktika meseleleri boyunca «sıcaq ağ» açıldı, dep bildire martnıñ 6-nde Rospotrebnadzornıñ Qırım idaresi.
İdareniñ malümatına köre, 2019 senesi martnıñ 4-nden 18-ne qadar vatandaşlarğa mesleat berecek «sıcaq ağ» telefonı (+79789191123) çalışa:
Qırımda qızamıq hastalığınen bağlı epidemik vaziyeti; qızamıq profilaktikası tedbirleri; ealiniñ qızamıqqa qarşı immunizatsiya meseleleri (aşı qayda yapıla, içindekiler, istisalcı, tibbiy müessiselerde olğan aşı); tasil müessiselerinde sıñırlav tedbirleriniñ kirsetilüvinen bağlı meseleler.
«Sıcaq ağ» bazarertesi kününden cuma kününe qadar saat 9:00-dan 18:00-ge qadar çalışa. Cumaertesi, bazar künleri – raatlıq.
Qırım.Aqiqat elde etken malümatqa köre, «sıcaq ağda» yuqunçlı bölükke muracaat etmege tevsiye etile, amma «anda tek diagnoz qoyulğanda baqalar» ve «(hastalarnıñ – QA) talili tek Moskvada yapıla», dep bildireler.
«Sıcaq ağda» şahsiy laboratoriyağa muracaat etmege ve sıvorotka bermege tevsiye eteler, «anda qızamıq çıqsa, M immunoglobulini olacaq».
Martnıñ 6-nda Rospotrebnadzor 2019 senesiniñ başından Qırımda laboratoriyada isbatlanğan 39 qızamıq hastası aqqında bildirdi. Bu raqam keçken sene qayd etilgen seviyege yaqınlaştı. Eñ çoq Aqmescit, soñra Bağçasaray, Aqyar, Canköy, Qurman ve Aqmescit rayonlarında qızamıq hastaları qayd etilmekte.
2018 senesi Dünya sağlıq teşkilâtı Avropada qızamıq hastalığınıñ rekord seviyesine çıqqanını qayd etti. Birinci 6 ayda 41 biñ insan qızamıq oldı, soñki 10 yılda er yıl olğanından daa ziyade.
Qızamıq bir insandan başqasına öksürik, sıqı şahsiy bağlarda keçe. Virus bir yerde eki saat devamında faal qala ve avada saqlana. Başta hastanıñ suvuqlanuv alâmetleri ola: tımav, sıcaq, öksürik, tahminen bir aftandan tökme çıqa (başta, soñra ise – vucutnıñ ust ve alt qısımlarında). Qızamıq ağırlaşuvları arasında – siñir sistemasına zarar ketirüv, pnevmoniya, otit, közlerniñ zayıflaması.
