Qırımdaki Rospotrebnadzor regionlarara idaresiniñ yolbaşçısı Natalya Penkovskaya qızamıq çıqarğan qırımlılarnıñ sayısı artqanını bildirdi. Onıñ aytqanına köre, Qırımda qızamıq çıqarğan 47 insan qayd etildi.
«2019 senesiniñ başından cumhuriyette qızamıqnıñ qırğınlıq vaziyeti kerginleşti. Martnıñ 12-ne qadar qızamıq olğan 47 insan qayd etildi. Qızamıq çıqarğanlarnıñ 70%-ı qızamıqqa qarşı aşılanmağan edi. Bu sene ailelerde qızamıq ekinci kere çıqıp, vaziyetni zorlaştıra», – dedi o.
Kreml kontrolindeki Qırım sağlıq nazirligine 2019 senesi aprelniñ 1-nden oktâbrniñ 1-ne qadar qızamıqqa qarşı büyük aşı kampaniyasını keçirmege vazife berildi.
Martnıñ 6-nda Rospotrebnadzor 2019 senesiniñ başından Qırımda laboratoriyada isbatlanğan 36 qızamıq hastası aqqında bildirdi. Bu raqam keçken sene qayd etilgen seviyege yaqınlaştı. Eñ çoq Aqmescit, soñra Bağçasaray, Aqyar, Canköy, Qurman ve Aqmescit rayonlarında qızamıq hastaları qayd etilmekte.
2018 senesi Dünya sağlıq teşkilâtı Avropada qızamıq hastalığınıñ rekord seviyesine çıqqanını qayd etti. Birinci 6 ayda 41 biñ insan qızamıq oldı, soñki 10 yılda er yıl olğanından daa ziyade.
Qızamıq bir insandan başqasına öksürik, sıqı şahsiy bağlarda keçe. Virus bir yerde eki saat devamında faal qala ve avada saqlana. Başta hastanıñ suvuqlanuv alâmetleri ola: tımav, sıcaq, öksürik, tahminen bir aftandan tökme çıqa (başta, soñra ise – vucutnıñ ust ve alt qısımlarında). Qızamıq ağırlaşuvları arasında – siñir sistemasına zarar ketirüv, pnevmoniya, otit, közlerniñ zayıflaması.
