İşğal etilgen Qırımnıñ Aqmescit rayonındaki Bavurçı (Kamenka) qasabasında noyabrniñ 28-nde Rusiye uquq qoruyıcıları qırımtatarlarnıñ evlerinde tintüv keçire.
Bu aqta noyabrniñ 28-nde qırımlı advokat Mammet Mambetov Qırım.Aqiqatqa bildirdi.
«Tintüv Ruslan Murtazayevniñ evinde ve babası ve qardaşı yaşağan qomşu evde keçirile. Ev Adamanov soqağında yerleşe. Tintüvniñ sebepleri daa belli degil. Tintüv vaqtında Ruslan evde yoq edi. Şimdi anda ketem», – dedi Mambetov.
Rusiye uquq qoruyıcıları noyabrniñ 28-nde saba Aqmescitte Ukrain medeniyet merkeziniñ faali Galina Balabannıñ evinde tintüv keçirip, tehnikanı alıp ketti.
Rusiye Qırımnı işğal etken soñ andaki akimiyet mustaqil jurnalist, cemaat faalleri, qırımtatar milliy areketiniñ faalleri, Milliy Meclis azaları ve Rusiyede yasaqlanğan «Hizb ut-Tahrir» teşkilâtınen alâqaları bar olğanında şeklengen Qırım musulmanlarınıñ evlerinde sıq-sıq tintüv keçire.
