Birleşken Milletlerniñ Monitoring missiyası Rusiye işğal etken Qırım ve Aqyarda halqara gumanitar uquqı ve insan aqlarınıñ bozuluvını qayd etmege devam ete. Missiya malümatına köre, yarımadada qırımtatarlarğa qarşı reyd ve tintüvlerniñ sayısı 2018 senesiniñ ilk yarım yılına baqqanda 2019 senesiniñ ilk yarım yılında arttı.
Böyle malümat missiyanıñ Ukrainadaki insan aqları vaziyetine dair 27-inci maruzasında aydınlatıldı, dep bildire Qırım Muhtar Cumhuriyeti prokuraturasınıñ matbuat hızmeti.
Berilgen malümatqa köre, «tutulğan şahıslarnı Qırımdan Rusiyege çıqarmağa ve yarımada işğalinden evel içtimaiy ağlarda paylaşılğanlar içün ekstremizmde qabaatlamağa devam eteler».
Qayd etilgenine köre, BM missiyası işğal altındaki topraqlarda keregi kibi çalışıp olamay.
«Rusiye, BM Baş Assambleyasınıñ Ukraina topraq bütünligine dair qararları talap etkeni kibi, işğalci akimiyet olaraq missiyanı alâ daa yarımadağa almadı», – dep aytıla haberde.
QMC prokuraturası qayd ete ki, malümat BM missiyasınıñ «yarımadada insan aqlarınıñ bozuluvınen bağlı cinaiy davalar çerçivesinde» ögrenile.
Daa evel BM Ukraina insan aqları monitoring missiyası 2017 senesiniñ başından 2018 senesiniñ ortasına qadar ilhaq etilgen Qırımda 80-den ziyade insan aqlarınıñ bozuluvını qayd etti.
2018 senesi sentâbrniñ 25-nde BM insan aqları Yuqarı komissarınıñ idaresi Rusiyeniñ işğal etilgen Qırımda yapqan cinayetlerine dair maruzanı aydınlatqan edi.
Rusiyeniñ insan aqları vekâletlisi Tatyana Moskalkova 2018 senesi aydınlatılğan Qırım maruzasını tenqit etip, vesiqada yarımada vaziyeti «adaletsiz ve bir taraflı» kösterildi, dep bildirdi.
Rusiyeniñ Qırım işğalinden soñ mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» teşkilâtı ile alâqaları bar olğanından şübheli sayılğan qırımlı musulmanlarnıñ evlerinde kütleviy tintüvler sıq-sıq ötkerilip başladı. Rusiye akimiyeti milliy ve diniy sebeplerden taqip olğanını inkâr ete.
