Link açıqlığı

Qırımda qırımtatarca qonuşqan ösmürni köteklediler


Belgisiz şahıslar Aq-Meçet qırımtatarlar toplu yaşağan qasabasınıñ 14 yaşında sakinini qırımtatarca laf etkeni içün köteklediler.

Bunı jurnalistlerge ösmürniñ soy-sopları bildirdi, dep yaza «15 minut».

Vaqia martnıñ 31-de saat 17-lerde olıp keçti, lâkin tek bu künleri haber tarqaldı. Yaş oğlan mektepten qaytır eken, cep telefon vastasınen bağlanıp, qırımtatarca laf etken edi.

Oğlançıqnıñ anası bildire ki, eki belgisiz adam onıñ millet mensüpligini sorap, onı aqaretledi ve köteklediler.

«Olar, Qırım – Rusiye, Qırım qırımtatarlarnıñ degil, er kesni mından quvmaq kerek, dep ayta ediler. Oğlum doğru laf etmege rica etkende, olar onı yıqtı ve köteklediler», – dedi qadın.

Oğlannıñ burnunı sındırdılar, oña ameliyat yapıldı ve bu künleri hastahaneden çıqardılar. Ösmürniñ ana-babası uquq qorçalayıcı organlarına ariza yazdı. Qasabanıñ açuvlanğan sakinleri toplaşıp, militsiyadan cinayetçilerni tapmaq ve cezalamağa talap ettiler.

Qırımtatar Milliy Meclisi Rusiye Federatsiyasınıñ prezident temsilciligine muracaatta bulunıp, olıp keçken vaqianı ögrenmege rica etti.

Malüm ki, Qırım Anayasasında qayd etilgeni kibi, qırımtatar tili, rus ve ukrain tillerinen bir sırada, devlet tili olaraq tanıla.
XS
SM
MD
LG