Aqmescit – Bugün saba Qırımda qırımtatar halqınıñ VI Qurultayınıñ nevbetten tış 2-nci sessiyası başlandı. Qurultay soñki 90 yıl içinde ilk kere Bağçasarayda keçirile ve 20 yıllıq müddetinde ilk kere qırımtatar halqınıñ lideri Mustafa Cemilev bu toplaşuvda bulunmay.
Qırımtatar halqı Qurultayınıñ nevbetten tış sessiyasında «Qırımda içtimaiy-siyasiy vaziyet ve qırımtatar halqı milliy idare organlarınıñ vazifeleri aqqında» mesele baqılacaq.
Qurultay sessiyasında iştirak etken musafirleriniñ arasında Rusiye müftiler Şurasınıñ reisi Ravil Gaynutdinov ve Tatarstan Prezidenti Rustam Minnihanov bulunalar.
Qırımtatar milliy Qurultayınıñ açılışında, evelleri olğanı kibi, Ukraina gimni yanğıramadı. Yalıñız qırımtatar gimni icra etildi.
Qurultay vekilleriniñ qayd etkeni kibi, toplaşuv devamında Mustafa Cemilev ile skayp vastası ile bağlanmağa planlaştıralar.
