Qırımnıñ on provayderi 14 ukrain haber saytını, 2 içtimaiy ağnı, Qırımtatar Milliy Meclisi ve «Hizb ut-Tahrir» teşkilâtınıñ saytlarını blok ete, dep haber etile 2019 senesi mayıs-iyün aylarında Qırım aq qorçalayıcı gruppası keçirgen monitoring neticelerinde.
«2019 senesi iyünniñ soñuna qadar bu provayderler esas Ukrainada serbest çalışqan eñ az 19 saytnıñ kirişini qapata: «tsenzor.net», «sled.net», «UAinfo», «5 kanal», «Fokus», «Glavnoye», «Depo», «Ukrainskaya pravda», RBK, «Ukrinform», «Levıy bereg», «Glavkom», «Zerkalo nedeli», «Striçka», Linkedin ve Telegramm içtimaiy ağlarınıñ saytları ve Qırımtatar Milliy Meclisiniñ saytları, İyegova şaatları ve «Hizb ut-Tahrir» saytları», – dep aytıla haberde.
İlhaq etilgen Qırımnıñ müessiseleri bu malümatnı şimdilik izaatlamadı.
Hatırlatamız, Ukraina tele ve radio yayınları meseleleri milliy şurası iyülniñ 4-nde evelki izinleri bitken kütleviy haber vastalarınıñ Donbasnıñ işğal etilgen yerleri ve işğal etilgen Qırımda vaqtınca yayınlanmasına izin berdi.
2017 senesi Ukraina BM Halqara mahkemesinde Rusiyege qarşı dava açtırıp, onı Ukrainada terrorizmnm maliye etip qoltutqanı içün, em de Ukrainağa qarşı istilâ çerçivesinde ayırım yapqanı içün mesüliyetke çekilmesini talap etken edi. Vaziyetni köz ögüne alğan mahkeme 2017 senesi aprelniñ 19-nda Ukrainanıñ talabınen Rusiyege qarşı vaqtınca tedbir almağa qarar qabul etti.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
