Qırımda Qırımtatar milily areketiniñ veteranı Kurseit Abdullayev keçindi. Bunı advokat Nikolay Polozov haber etti.
"Bütün ömrü devamında qırımtatarlarnıñ öz vatanı Qırımğa qytması ve öz toprağında bahtlı yaşaması oğrunda küreşken adam. Kurtseit ağa yerli özidare organlarınıñ işinde faal iştirak etti, Qırımtatar Milliy Qurultayınıñ teftiş komissiysınıñ azası edi", - dep yazdı Polozov.
Advokatnıñ sözlerine köre, 2014 senesinden başlap, Qırım Rusiye tarafından işğal etilgen soñ, Kurtseit Abdullayev "ukrayinalı siyasiy mabüslerini - qırımtatarlarnı faal şekilde desteklep başladı, mahkeme oturışlarına qatnadı, siyasiy mabüslerniñ qorantalarına yardım etti".
"Soñki vaqıt Kurtseit ağa ağır hasta edi. Hastalıqnen bar küçünen küreşe edi. Ve hastalıqqa baqmadan faal olmağa devam ete edi", - dep qoştı Polozov.
2015 senesi mart ayında Kurtseit Abdullayev Aqmescitte şair Taras Şevçenkoğa bağışlanğan hatıra aktsiyasında Ukrayina bayrağını numayış etkeni içün 20 saat mecburiy işlerge mahküm etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
