Qırımda qırımtatar milliy areket faali Nuri Osmanov vefat etti. Bunı "Qırım birdemligi" birleşmesi haber ete.
"Tünevin (sentâbr 16-sında - QA) Qurultay delegatı ve qırımtatar milliy areketiniñ faali Nuri Osmanov vefat etti. Soñki sefer faallerimiz onı sentâbr 5-inde Seyitler (Nijnegorskiy) rayonında Ayder Kadırovnı desteklegen duada kördi", - denile beyanatta.
"Qırım birdemligi" qayd etti ki, keçmişte Nuri Osmanov qırımtatarlarnıñ sürgünlikten soñ avdetinen bağlı bütün mitinglerde, şu sıradan Taşkentte 1987 senesi olğan büyük mitingde de iştirak ete edi. Qırımğa faal 1988 senesi köçip keldi.
"2014-ünci yıldan soñ o, Qırımda siyasiy mabüsleriniñ qorantalarını desteklegen ve olarğa yardım etmek içün teşkil etilgen bütün teşebbüslerge qol tutqanlardan edi", - qayd etile beyanatta.
"Qırım birdemligi"nde mevtanıñ qorantasına taziye bildirdiler.
