Qırımnıñ Lenino qasabasında qırımtatar İlyas Muslimovnıñ evinde tintüv keçirildi, dep haber ete "Qırım birdemligi".
''Saba saat beşte maskalı adamlar avtomatlarnen kireler, meni yerge yatqızalar ve maña terrorist ve SVO-ğa (Kreml Ukrayinağa qarşı cenkni böyle adlandıra) qarşı olğanımnı, teşviqat ve propaganda yapqanımnı köstergen vesiqalarnı köstere. Men yasaq etilgen fırqalarda bulunammı, Rusiyede qanun tarafından yasaq etilgen tedbirlerde iştirak etemmi, qırımtatar Meclisinen alâqam barmı, Meclis ile evelden bir de bir tedbirlerde iştirak etken edimmi kibi sualler berildi", - dep tarif etti Muslimov.
Başta bütün sualler Muslimovğa yönelgen edi, amma neticede Rusiye quvetçileri onıñ oğlu - futbol trenerэ Asannı belli olmağan yerge alıp ketti.
"Tintüv keçirdiler, neticede toqtadılar ve ayttılar: "Ebet, kene boş yerge keldik". İç bir şey tapılmadı, tintüvde dört resim qırıldı. Arbiyler olarğa sert davrandı, avtomatlarnen. Neticede oğlumnı alıp kettiler. Bütün vesiqalar menim aqqımda edi, oğlumnı ise alıp kettiler", - dep qoştı qırımtatar.
Muslimovnıñ aytqanına köre, Rusiye quvetçileri oña protokol nushasını qaldırmadı, cep telefonlarını da tutıp aldılar.
''Avtomatlı arbiy qadınıma qarşı sert davrandı, o, dua etmek kerek edi, amma oña izin bermediler. Neticede oğlumnı alıp kettiler, men olarğa: "Ne içün meni alıp ketmeysiñiz?" dedim, olar: "Biz laf etip, yiberirmiz", dediler. Stres altında edim, qan basımı köterildi, acele yardım keldi. Biz poliske barıp, ariza yazmağa qarar berdik, oğlumıznı ne yerde ve qaysı teşkilât alıp ketkenini bilmeymiz", - dep qoştı Muslimov.
Keçende Aqmescitte Rusiye Ekstremizm ile küreş merkeziniñ hadimleri FSB binası ögünde advokat Emil Kurbedinovnı tuttı. Oña qarşı «Kütleviy malümat serbestligini suistimal etüv» maddesine istinaden protokol tizildi. Laf Telegram kanalında advokatnıñ «KEMska volost» yazğanları aqqında kete. O haberde askerligi soñrağa qaldırılması mümkün olğan studentlerge celpname kelgen olsa, Rusiye Federatsiyası saflarına nasıl oğramamaq mümkün olğanı tarif etile.
«Gratı» Ukrayina neşiriniñ malümatınakore, yanvarniñ 23-nde E Merkeziniñ polisi E.R.Belâlovadan Kurbedinovnıñ yazğanlarına dair haber aldı ve eki künden soñ teşkerüv teşkil etti. Büyük ihtimalnen, Emine Refatovna Belâlova – «Zafer göñüllileri» («Volonterı pobedı») Kezlev areketiniñ reberi aqqında aytıla.
Kurbedinov – aq qorçalayıcı advokat. O, Rusiye akimiyetiniñ yarımada işğalinden soñ taqip etilgen qırımtatarlarnı qorçalay. Uquqçı Qırımda insan aqlarınıñ bozuluvına da diqqat celp etmege tırışa.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
