Qırımtatar faallerine mayısnıñ 10-nda planlaştırılğan «Bilgi Kervanı» maarif aktsiyasını keçirmege izin bermediler. Onıñ maqsadı mektep talebeleriniñ ana-babalarınen ya da mektepke baracaqlarnıñ ana-babalarınen körüşip, olarğa qırımtatar tilinde tasil almaq aqqınıñ qullanuvını ve ariza berilmesini añlatmaqtan ibaret edi.
Körüşüv Zuya qasabasında keçirilecek edi, yerli qavehanelerden biriniñ saibine telefon etip qorquzğanlar. O, bina bermekten vazgeçti.
Bu aqta qırımtatar faali Nariman Celâl Facebookta tarif etti.
«Sabadan haber aldıq, bu qavehaneniñ saibine organlarnıñ hadimleri telefon etip, tevsiye bergenler ve atta qorquzğanlar, problem çıqacaq, degenler. Ondan bu tedbir içün bizge yer bermekten vazgeçmesini talap etkenler. Saipke bir iddiamız yoq, çünki bunıñ kibi vaziyetler çoq olğan edi, amma Qırımda yaşağan vatandaşlarnıñ faaliyetine olğan munasebet bir qaç yıldan berli qanunğa köre aqlarımıznı qorçalamağa tırışıp, yaşamağa devam etken qorqunç vaziyetimizni köstere», – dedi Celâl.
Celâlnıñ bildirgenine köre, tedbirni keçirmek içün yañı imkân tapılğanına qadar qaldırğanlar.
Qırımnıñ Rusiye akimiyeti bunıñnen bağlı resmiy bir izaat bermedi.
Qırımnıñ Rusiye tasil nazirligi bildirgenine köre, 2018-2019 oquv yılında Qırımda 200700 bala oquy, olardan 6100 (3,1%) qırımtatarca ve 249 (0,2%) ukraince tasil ala. Qırımnıñ Tasil nazirliginiñ malümatına köre, yarımadada 15 qırımtatar mektebi ve bir ukrain mektebi çalışa, qırımtatar tilinde ders berilgen 126 sınıf olğan 27 mektep ve ukrain tilinde ders berilgen 8 sınıf olğan 5 mektep çalışa.
Qırımtatar Milliy Meclisiniñ azası Eskender Bariyev yarımadada çalışqan 16 mektepten yedi danesi qaldı, dep bildirdi.
Ukraina tasil ve ilim naziri Liliya Grineviç Rusiye işğal etken Qırımda ukrain ve qırımtatarlarnıñ ana tilinde tasil almaq aqqı bozula, dep bildirdi.
