Fevralniñ 5-nde aqşam Rusiye Federalk telükesizlik hızmetiniñ hadimleri qırımtatar faali, Sudaq regional Meclisiniñ reisi İlver Ametovnıñ evinde daa bir tintüv keçirdi. Bunıñ aqqında öz Facebook saifesinde faal Elmaz Akimova haber etti.
"Tintüv aqşam saat 7-lerde başlandı. Al-azırda tintüv bitti. Tintüvni FSB, OMON, Tahqiqat komiteti, Kefe ve Sudaq şeerleriniñ polisi keçirdi. Bundan ğayrı Acele yardım, RES, MÇS, GAİ, işaretleri olmağa maşna bar edi. Episi olıp tintüvde 40-qa (!) yaqın hadim iştirak etti. Tintüv qararı ev saibine taqdim etilmedi", - dep yazıla bildirmede.
Akimovanıñ malümatına köre, tintüv sebebi, Kefe işğal polisiniñ bildirgeni kibi, Kıyivniñ 044 nomerinden polis bölügine telefon açılması olğan.
"Telefon açqan kişi İlver Ametovnıñ evinde cinayet yüz bergenini aytqan - "bu adreste mekân qaydı olğan oğlu qarısını pıçaqlap öldürgen". Elbette kelip iç bir şey tapmadılar. Tintüv keçirdiler, oğlunıñ qarısınen laf ettiler, bütün evni baqıp çıqtılar, er şeyniñ fotosını çektiler. Bir şey olmağanına emin olğan soñ episi İlver ağanıñ evini terk ettiler. Soñki on kün içinde bu artıq ekinci tintüvdir", - dep yazdı Akimova.
İlver Ametov – qırımtatar milliy areketiniñ faali, Sudaq regional meclisiniñ reisidir. 2019 senesi keçirilgen tintüv vaqtında siyasetçiniñ ev müzeyinden eskiy silâ eksponatlarını musadere etilgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
