Qırımda Qırımtatar bayraq Kününe bağışlanğan avto yürüşni keçirmege yasaq ettiler.
Aqmescit Şeer şurası Qırımtatar bayraq Künü munasebeti ile keçirilecek tedbirlerniñ teşkilâtçılarına iyün 26-da avto yürüşni keçirmege izin bermedi.
Bunı Qırım.Aqiqat saytına qırımtatar milliy Meclis kâtibiyetiniñ yolbaşçısı ve Qırımtatar bayraq Künü çerçivesinde olacaq tedbirlerniñ teşkilâtçılarından biri olğan Dilâver Akiyev bildirdi.
Onıñ sözlerine köre, bu sene 20-30 maşınadan ibaret olğan kollonalar yarımadanıñ çeşit regionlarından yolğa çıqıp, Aqmescitte Trenöv bağçasınıñ yanına kelmek kerek edi.
Faqat, şeer şurasınıñ resmiy cevabında «avtonaqliyatnıñ belgilengen sayısı ile (115) avto yürüşniñ iş vaqıtta keçirilüvi taşıyıcı ve yolcular içün qolaysızlıqnı ketire ve olarnıñ aqlarını boza bilecek» dep yazılğan edi.
Aynı vaqıtta, şeer «akimiyeti» avto yürüşniñ yolunı deñiştirimek, merkeziy soqaqalarnı cedvelden çıqarmaq ve yolnuñ soñunda «Salgirka» bağçasına kelmege teklif ete.
Hatırlatamız, evelleri Aqmescit şeer şurasınıñ icra komiteti Qırımtatar bayraq Kününiñ teşkilâtçılarına tedbirlerni Trenöv bağçasında keçirmege yasaq etken edi. Bu qararnı «cemiyetteki tertip-nizamı, diger vatandaşlarnıñ qanuniy menfaatı» bozula bilecegi ile añlattılar.
Al-azırda, Akiyevniñ sözlerine köre, qırımtatar milliy Meclisinde Bayraq Künü çerçivesinde tedbirderniñ Lenin meydanında keçirilmesi boyunca resmiy cevapnı bekleyler.
