Rusiye kontrolindeki Qırımnıñ Aqmescit rayon mahkemesinde "Qırım" mustaqil qırımtatar gazetine qarşı memuriy uquq bozuvı davasınıñ baqılması belgilendi, dep haber ete "Qırım esnası".
Qayd etilgenine köre, uquqiy şahısqa Ceza kodeksiniñ 13.15 maddesine istinaden qabaatlav seslendirile. Oturışuv oktâbrniñ 16-na tayin etildi.
"Qırım esnası" neşriniñ malümatına köre, neşir "çetel agentleri" olaraq tanılğan teşkilâtlar olğanı qayd etilmegeni içün qabaatlana. Sovet aq qorçalayıcısı Lüdmila Alekseyevanıñ tercimeialı aqqında yazılğan metinde, onıñ 1970-inci yıllarnıñ soñunda "Azatlıq Radiosı" ve "Amerika Sesi" ile işbirligi aqqında aytıla, Rusiye akimiyetiniñ talaplarına köre, olar tek "çetel agentleri" olaraq tanılğanı aqqında qayd etilmeli.
Faallerniñ qayd etkenine köre, bu, soñki yarım yıl içinde gazetke qarşı açılğan üçünci mahkeme olacaq.
Mayısnıñ 17-nde Qırımda Rusiye quvetçileri "Qırım" gazetiniñ baş muarriri Bekir Mamutovnıñ ve "Qırım" gazetiniñ tesisçisi Seyran İbragimovnıñ evlerinde tintüvler keçirden edi.
Mamutovğa qarşı eki protokol tizildi, o, Rusiye ordusınıñ itibarını tüşürgen ve "Qırım" gazetiniñ saytında derc etilgen malümatlar içün doğru olmağan malümatlarnı tarqatqan. İbragimovğa aynı maddeler boyunca eki protokol tizildi.
"Qırım" gazeti qırımtatar tilinde 1989 senesi iyül ayından berli çıqa ve qırımtatarlar Qırımğa qaytqan soñ bu tilde çıqqan ilk neşirlerden biridir.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
