Rusiye politsiyası Qurmandaki «Hizb ut-Tahrir davasınıñ» mabüsi Rustem Emiruseinovnıñ anası Zureden «Oğlum – terrorist degil» degen yazuvlı şiarını tutıp aldı ve oña qarşı protokol tizdi, çünki bir kişilik piketini «miting» dep saya. Bu aqta «Qırım birdemligi» bildire.
Berilgen malümatqa köre, Rustem Emiruseinovnıñ anasına «acele yardım» çağırıldı. O, tez köterilgen qan basımından yaramadı.
Bundan ğayrı, politsiya Rustem Emiruseinovnıñ anası ve ömür arqadaşından politsiya bölügine barıp, yolda ne yapqanlarınen bağlı malümat bermelerini talap ete. Qadınlar qarşı çıqıp, qanuniy aqlarını qullandı, dep ayttı.
Daa evel berilgen malümatqa köre, Qurmandaki «Hizb ut-Tahrir davası» mabüsleriniñ üç anası «Oğlum – terrorist degil» yazuvlı şiarlarınen bir kişilik narazılıq aktsiyalarına çıqtı.
Rusiye quvetçileri bir kişilik narazılıq aktsiyalarınıñ keçirilüvi sebebinden protokol tizilgenini resmiy şekilde bildirmey.
Rusiyeniñ Rostov-na-Donu şeerindeki Cenübiy okrugınıñ arbiy mahkemesi noyabrniñ 3-nde Qurmandaki «Hizb ut-Tahrir davasınıñ» mabüsleri Rustem Emiruseinov, Arsen Abhairov ve Eskender Abdulganiyevniñ ükmüni çıqarmağa planlaştıra. Prokuror qırımtatarlarnı qabaatlı tanıp, sert rejimli koloniyada qalmalarına üküm etmege talap etti: Rustem Emiruseinov içün 1,5 yıl nezaret ile 18 yıl apis, Arsen Abhairov içün 15 yıl, Eskender Abdulganiyev içün 16 yıl.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
