Qırımda Aluşta-Partenit yolunda patapat ve polis maşnası iştiraginen yol qazası oldı. Bu aqta Vkontakte içtimaiy ağında “Avtopartnör” maşnasever gruppası bildire.
O yerde olğan adamlarnıñ sözlerinden “Vesti Krıma” saytı, mototsikl park etilgen polis maşnasına uruldı, dep bildire. Toquşmadan bir qaç saniye evel polis hadimleri maşnadan çıqqan edi. Olar zarar körmedi. Patapat aydavcısı ve onıñ yolcusı elâk oldı.
Matbuatqa köre, derbe o qadar küçlü edi ki, maşna tap avdarıldı. Videoda, mototsikl DPS maşnasınıñ kenarına urulğanı körüne. Areket yolağına köre maşna nasıl turğanı - belli degil.
Rusiye FVN-niñ ve İİN-niñ Qırım idarelerinde bu qaza aqqında haber etmeyler.
2018 senesi dekabr ayında Qırım qurtarıcıları Qırımda büyük yol qazalarınıñ sayısı arttı, dep bildirdi. Qırımda 2019 senesiniñ ilk üç ayı içinde keçken seneniñ aynı müddeti içinde mesüliyetke çekilgen aydavcılarnıñ sayısı bir buçuq qat ziyade oldı.
