İşğal etilgen Qırımda martnıñ 28-nden başlap iyünniñ 1-ne qadar pansionat, raatlıq evleri ve şifahaneler işini toqtata. Bu koronavirus tarqaluvınen bağlı, dep aytıla Rusiye kontrolindeki Qırım ükümetiniñ saytında.
«2020 senesi martnıñ 28-nden başlap 2020 senesi iyünniñ 1-ne qadar Qırımdaki pansionat, raatlıq evleri, şifahane-kuror teşkilâtlarında (şifahanelerde), gece-kündüz çalışqan şifahane bala lagerlerinde ve musafirhanelerde yerlerniñ ayıruvını toqtatmaq, iş yolculığı ya da hızmet yolculığında olğan şahıslar içün istisna yapılmalı», – dep aytıla buyruqta.
Qayd etilgenine köre, al-azırda Qırım şifahanelerinde bulunğanlar özüni tecrit etmeli ve qaluv müddetini uzatıp olamaz.
Martnıñ 27-nde işğal etilgen Qırımda restoran, qave, bar, aşhane, bufet ve diger aş müessiselerini vaqtınca qapatmağa qarar alındı. Sımarış berip almaq ve evge sımarış etmek imkânı olacaq.
Aqyarda 5 koronavirus hastası qayd etildi. Qırımda hastalanğanlarnıñ sayısı 14 insan oldı.
Koronavirus yuqunçınıñ tarqaluvına yol bermemek içün işğal etilgen Qırım ve Aqyarda «yüksek seviyeli azırlıq» rejimi ilân etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
