Qırımda Keriç boğazında Rusiye FSBsi tarafından esir alınğan Ukraina arbiy deñizcilerine yardım etmek içün tahminen 140 biñ ruble (59 biñ ğrıvnâ – QA) toplandı.
Bu aqta noyabrniñ 28-nde qırımtatar milliy areketiniñ faali Nariman Celâl Qırım.Aqiqat Radiosınıñ yayınında ayttı.
Onıñ qayd etkenine köre, Ukraina deñizcileriniñ tutılğanı haber etilgende olarğa «gemilerden şahsiy eşyalarını almağa izin berilmegeni» belli oldı, bir çoq insan olarğa yardım etmek kerek, dep aytmağa başladı. Paranı kartqa yollağanlar ve el-elden bergenler, çoq insan aş, urba, gigiyena eşyalarını ketirgen edi.
Şimdilik para toplanması toqtatıldı, dedi Celâl.
«Aqşamğa yaqın yardım etmege istegenlerden toqtamağa rica ettim, SİZOğa berilgenlerniñ hususiyetleri bar. Anda belli şartlar bar: nasıl qutuda, ne bermege mümkün, keyfiyeti ve ilâhre. Bugün çezip baqayıq… Keriçte bulunğan üç askerden ğayrı, bütün oğlanlarğa eñ kerekli şeylerni yarın bermek içün Qırımda yeterli qadar para toplandı. Üç kişiniñ şaraitleri bir qarar, olar hastahanedeler», – dedi Celâl.
«Şunı da aytmaq isteyim ki, tuvğanları ve diger lâqayt qalmağan insanlar qasevetlenmesin, Aqmescit SİZOsında qanunsız mahküm etilgenler çoq, olar deñizcilerni lâyıq bir şekilde qarşılarlar. Bilemiz ki, ilk ihtiyac eşyaları endi berildi. Anda, içeride, diqqatsız qalmaycaqlar», – dep qayd etti Celâl.
Salı künü, noyabrniñ 27-nde, faaller Keriç boğazında FSB tarafından esir alınğan Ukraina askerlerine Qırımda para toplanacağını ilân etken edi.
Kreml kontrolindeki Kiyev rayon mahkemesi çarşenbe künü, noyabrniñ 28-nde, Keriç boğazında tutılğan Ukraina deñizcileri ve Ukraina telükesizlik hızmetiniñ hadimlerini tevqif etti. Aqmescitteki Rusiye mahkemesi tarafından apiske alınğan Ukraina askerleri 6 yılğa azatlıqtan marum qala bile.
Qırım Muhtar Cumhuriyetiniñ prokuraturası Rusiyeniñ FSBsi tarafından tutılğan Ukraina deñizcilerini cenk esiri olaraq tanıdı.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi.
Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Daa soñra belli oldı ki, FSB Qara deñizde Ukraina gemilerine qarşı silâ qullandı. Kyivniñ malümatına köre, FSB açqan ateş neticesinde altı Ukraina askeri yaralandı. Rusiye FSBsi Ukraina gemilerine qarşı silâ qullanılğanını tasdıqlap, yaralanğan üç Ukraina deñizcisi aqqında haber etti.
Noyabrniñ 26-nda Ukraina Yuqarı Radası Keriç boğazında Rusiye arbiyleri tarafından Ukraina gemilerine açılğan ateş sebebinden bir qaç vilâyette cenk vaziyetini ilân etti.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
