Rusiye tarafından işğal etilgen Qırımnıñ Sudaq mahkemesi nefaqacı Valeriya Göldenbergni eki yıl yerleşme cezahanede qalmasına mahküm etti. "Gratı" ukrayin neşriniñ haber etkenine köre, qadın Ukrayinada elâk olğan rus arbiyiniñ mezarını aramlamada qabaatlanğan (Ceza Qanunnamesiniñ 244 maddesiniñ 2-nci qısmı).
Tahqiqatnıñ malümatına köre, aprelniñ başında Göldenberg öz köyündeki mezarğa qan ve necaset ketirip, martnıñ 24-nde Berdânsk limanında Rusiyeniñ "Orsk" desat gemisiniñ yoq etilüvi zamanı elâk olğan 21 yaşlı deñiz piyadesi Valentin İsayçevniñ mezarını bulaştırğan. Nefaqacını aprelniñ 9-nda tevqif ettiler.
"Gratı" yaza ki, Göldenberg areketini "intiqam duyğusı ve Ukrayinağa duyğudaşlıq" ile añlattı
"Rusiyeniñ Ukrayinağa ücüm etkenine qarşı olğanım içün, 2022 senesi aprelniñ 4-nde arbiylerniñ Kıyiv vilâyetindeki Buça, İrpin, Gostomelni azat etkenlerini bilgen soñ, cenkleşken ve Ukrayina topraqlarında elâk olğan Rusiye arbiyiniñ mezarına qan tökmege qararına keldim. Anda rus arbiyleri barışıqsever adamlarnı öldüreler", - dedi nefaqacı.
Neşirniñ malümatına köre, Valeriya Göldenberg 2000 senelerinden başlap Qırımda yaşağan doğma Poltavalıdır.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
